Հետազոտություններ

Սակայն այդ «կերպի» և դրանից բխող հասկացությունների ուսումնասիրման և հստակ սահմանումների համար խնդրին միայն սոցիոլոգիական կամ քաղաքագիտական մեթոդներով մոտենալը բավարար չէ․ առկա հարցերը հնարավոր չէ պարզաբանել՝ առանց խորանալու դրանց կրոնական, աստվածաբանական կամ, մեկ բառով ասած՝ մետաֆիզիկ հիմքերի մեջ։

Այս տեսանկյունից, հատկապես հայկական առանձին փորձը հասկանալու համար, առանձնահատուկ նշանակություն ունի «ազգ» և «ազգայնություն» հասկացությունների ուսումնասիրությունը պատմության հոլովույթում՝ քրիստոնեական աստվածաբանության լույսի ներքո։

Առաջին հայացքից «ազգ», «ազգայնություն» և «ազգայնականություն» հասկացությունները հաճախ հակասության մեջ են մտնում քրիստոնեության՝ որպես վերազգային կրոնի քարոզած գաղափարների հետ։ Այնուամենայնիվ, նույն Սուրբ Գրքում «ազգ», «ցեղ» եզրույթներից բացի հանդիպում են նաև այնպիսի ձևակերպումներ, ինչպիսիք են օրինակ «ընտրյալ ժողովուրդը» և «Աստծո ժողովրդը», որոնց այսպիսի կամ այնպիսի մեկնաբանությունները դարերի ընթացքում պատճառ են հանդիսացել ամենատարբեր «ազգային» կամ «ազգայնական» գաղափարների, ինչպես նաև առանձին քաղաքական միավորների առաջացմանը։